NO DIA DAS LETRAS GALEGAS

DECLARACIÓN INSTITUCIONAL

DA XUNTA DE GALICIA

17 de maio de 2012

Na gran celebración da nosa lingua e literatura, instituída pola Real Academia Galega cada 17 de maio, e que este ano acada a súa quincuaxésima edición, a Xunta de Galicia acordou sumarse á homenaxe correspondente ao Día das Letras Galegas de 2012.

Desde o Goberno de Galicia, entendemos esta data como unha celebración da nosa identidade. Aberto aos grandes intercambios do tempo actual, este día sitúa ante nós mesmos, no plano que lle corresponde, o valor da nosa expresión literaria e, canda este, o da nosa presenza, con personalidade propia, na realidade cultural na que nos inserimos.

Sumándonos á proposta da Real Academia Galega, que escolleu a Valentín Paz-Andrade para esta efeméride especialmente significativa, dentro dunha tradición que marca a evolución cultural de Galicia, desde esta institución tomamos a súa obra como un modelo de inmensa lucidez para a vertebración dunha sociedade de moi singular bagaxe cultural, decantada en milenios de peregrinación intelectual e espiritual cara á nosa terra e en séculos de proxección exterior, nos planos económico e intelectual, en Europa e en América.

O Presidente Feijóo co Presidente da Real Academia Galega

Cremos que, deste xeito, a nosa iniciativa se fai eco da vontade de todas as galegas e de todos os galegos, ao tempo que reforzamos a mensaxe de concordia e de confianza nas nosas posibilidades para a apertura de novas e mellores expectativas, na nosa convivencia e na forma en que a nosa presenza se integra no mundo.

Este Goberno súmase á chamada anticipatoria dun dos grandes homes das nosas letras, que soubo desenvolver con mestría innumerables facetas, desde a poesía ao xornalismo, co ensaio e a crítica sumadas nun home que viviu todo con intensidade infatigable. Con tal entrega ao labor intelectual, soubo dexergar na unidade dos galegos, e na confianza nos recursos dos que dispoñemos, un camiño de prosperidade e de horizontes amplos, no que a pluralidade de ideas e de perspectivas sobre o feito común dunha Galicia nova resulta compatible coa suma de activos de todas as procedencias cara ao obxectivo común, situado en traer á realidade tanxible aquilo que o noso potencial nos ofrece xenerosamente.

Valentín Paz-Andrade, emprendedor, creador literario e analista económico, concibiu esta transformación posible a partir do estudo dos datos, recompilados e interpretados dun xeito rigoroso. A través del comprobamos como a mente creadora, a investigadora e a do empresario con miras elevadas representan aquilo ao que Galicia aspira, sustentada nas súas capacidades individuais e sociais e na riqueza que posúe, sobre a que podemos construír a nosa calidade de vida, na responsabilidade e na apertura á obra común, que nos beneficia como conxunto indivisible.

Acto institucional na Real Academia Galega